നീ എനിക്കായി രാവിനെക്കൊണ്ടു നിലാവ് പെയ്യിച്ചു
കരിമുകിലിനെക്കൊണ്ടു മാരിവില്ല് വിരിയിച്ചു
പൂക്കളെക്കൊണ്ടു മണം പരത്തി
കുയിലിനെകൊണ്ടു പാട്ടു പാടിച്ചു
അമ്മേ …
എന്നിട്ടും ഞാന് നിന്നെ നിഷ്കളങ്കതകാട്ടി വഞ്ചിച്ചു .
നീ എന്നേയുറക്കാന് ഉറങ്ങാതിരുന്നു
എനിക്ക് കാണാന് നിന്നെ തന്നെ എരിച്ചു
എനിക്കുടുക്കാന് നീ ഉടുപ്പഴിച്ചു
എന്നെ ഊട്ടാന് നിന്നെ തന്നെ വിറ്റു
എന്നിട്ടും നീ എനിക്കായി ചുരന്നതൊക്കെയും ഞാന് മറന്നു
നിന്റെ നടവഴികളില് ഞാന് കുപ്പിച്ചില്ലുകള് വിതറി
നിന്റെ മുറിവുകളില് ഞാന് ഉപ്പുപുരട്ടി
നിന്റെ സിരകളില് വിഷമെന്നു ഞാന് വിളിച്ചു പറഞ്ഞു
നിന്നെ വിട്ടു ഞാന് ഓടിയകന്നു
അമ്മേ എങ്കിലും നീ എന്നെ നിഷ്കളങ്കമായി സ്നേഹിച്ചു ..
ഞാന് നിന്നെ വിരുന്നു വിളിച്ചില്ല
എന്റെ കുഞ്ഞുങ്ങള് നിന്നെ മുത്തശ്ശിയെന്നു വിളിച്ചില്ല
നിന്റെ രോഗശയ്യക്കരികില് ഞാന് ഉറങ്ങാതിരുന്നില്ല
നിന്റെ മരണത്തിനു ഞാന് വഴിപാടു നേര്ന്നു ..
അമ്മേ എങ്കിലും നീ എന്നെ വെറുക്കാതിരുന്നു ..
അമ്മേ എങ്കിലും നീ എന്നേ സ്നേഹിച്ചതെന്തിന്.....…..
No comments:
Post a Comment